2022 LI
Bookprissentasie ieëste dichbunjel ‘Vanmichveurdich’ in Bibliotheek Ech
De ieëste laezing die Laura goof vónj plaats op 9 april 2022 ter introductie van de Nationale Bokewaek in ‘Laeswinkel de Domijnen’ in Ech. ’t Ging daobie in op ’t thema leefde en besjreef häör in allerlei vórme en maote: van leefde veur ‘ne partner, toet leefde veur dien vrunj, ’n kèndj, dien beroep, ’n sport en natuurlik ouch leefde veur de Limburgse taal, veur dichzelf en ’t laeve ‘an sich’.
Bookhanjel Dominicanen Mestreech (Bokewaek 2022)
Op 15 april 2002 móch Laura, es officieël óngerdeil van de Nationale Bokewaek, in de prachtige bokehanjel Dominicanen te Mestreech häöre dichbunjel aan ‘n groat publiek prissentere. ’t Waerde ’ne hieële bezunjere middig wo-in Laura euver häör sjriefproces vertèlde en mit name ouch de aanleijing besjreef, woróm ’t in mei 2020 häör ieëste veur häör zoa belangrieke gedichske sjreef:
“Soms zit ‘t taege
Soms zit ‘t mit
‘t Laeve is neet altied mekkelik
Daovan krigs se pit”
Laura haef ’n chronische reumatische ziekte genaamd fibromyalgie. Daodoor haef ’t dagelijks las van o.a. pien- en vermeuidheidsklachte en kós ‘t ‘ne hieële tied neet wèrke. ’t Woor moeilik óm hie mit óm te lieëre goan, zoawaal privé es op ’t werk.
Inmiddels haef Laura gelieërd häör persuuenlikke grenze te acceptere en stuit ’t weer parttime es docente Duits veur de klas en duit ‘t, waat ’t allerleefste duit: luuj inspirere, motivere en mit-ein verbènje.
Mit behulp van häör Limburgse gedichskes, spruk ’t noe ouch ’n breijer publiek in häör eige modertaal aan en dao geneet ’t mit volle teuge én hieël väöl dankbaarheid van.
Taaldaag Fontys Zitterd
Van kleins aaf aan wól Laura al lieërares waere. ’t Ging gaer nao sjoal en vónj ’t fijn óm get van häör meisters en juffrouwe te lieëre. Taal haef ’t altied interessant gevónje, want es se dezelfde taal spruks, den verstuis se dich óngerein baeter!
Laura koos oeteindelik veur Duits en inmiddels is ’t al zó’n 10 jaor mit väöl plezeer wèrkzaam es ‘Dozentin für Deutsch als Fremdsprache’. ’t Haef zoawaal ervaring in ’t internationale middelbare óngerwies es in ’t hoger óngerwies en leidde op de Fontys Lerarenopleiding te Zitterd mit väöl passie studente toet docente en docentes Duits op.
Tiejes de zoageheite Taaldag Sittard op 5 april 2022 mit de titel ‘Lezen is ’n feestje’ droog Laura ’n aantal van häör gedichskes bie Fontys veur, die ginge euver ’t naostreve van doele, ’t durve make van foute en ’t óntwikkele van zelfvertrouwe en ’t realisere van druime. De positieve reacties van de aanwezige docente lete Laura merke, det ouch in ’t óngerwies behoefte is aan ’t lieëre en gebroeke van de Limburgse taal. Taal is ’n stökske identiteit en daomit óngerdeil van emes ziene persoan. ’t Nederlands en ’t Limburgs hove neet mit-ein te concurrere en kènne gewuuen naeve-ein bestaon.
Tiejes dit symposium woor ouch meister in opleijing Pim Lebens aanwezig. Hae kóch Laura’s dichbunjel en ging inne klas mit ‘t thema gedichskes aanne sjlaag. Zien leerlinge sjreve d’r op los en Laura waerde oppe sjoal oetgenuuedigd óm euver ‘t sjrieverslaeve te vertèlle, gedichskes veur te drage én nao de gedichskes van de kènjer te loestere. Dao zoot ‘ne hieële houp talent tösse! Laura waerde verrast mit ‘n prachtig gedich gesjreve door Pim (neet de meister) en Ties oet groep 7 en 8 det ze speciaal veur häör op ‘n tegelke hawwe laote drökke. ‘n Geweldig aandènke aan ‘n hieël bezunjer moment!
Sterre zeen sjös wie luuj
Ze zeen d’r in allerlei maote, klein en grwöat
Ze waere gebaore en gaon auch weer dwoad
En dat eedere kjèr opnuuj
25 jaorig jubileum Starterscentrum Limburg
Op 17 november 2022 móch Laura tiejes ‘t 25 jaorig jubileum van het Starterscentrum Limburg anger óngernummers inspirere door ‘n aantal van häör gedichte veur te drage. ‘n Magisch moment! Get waat in ieëste instantie begós es ‘n persuuenlike oetlaotklep óntwikkeltj zich stieëds mieë toet ‘n middel van verbénjing en inspiratie. Get óm dankbaar veur te zeen!
Bookprissentasie twieëde dichbunjel ‘Höb ‘t laeve leef’ in Bibliotheek Ech
Op 17 december 2022 prissenteerdje Laura häör twieëde dichbunjel getiteld ‘Höb ‘t laeve leef’ in de Bibliotheek in Ech. Tiejes häöre veurdrach spaordje ‘t luuj veural aan óm hun laeve, zichzelf, hun ómgaeving, anger luuj en natuurlik ouch ‘t Limburgs leef te höbbe!
2023
Nuujjaorsreceptie Vrienden van Fotomuseum aan ‘t Vrijthof
Laura waerde door Fotomuseum aan ‘t Vrijthof in Mestreech oetgenuuedigd óm ‘n paar wäörd tiejes de nuujjaorsreceptie van de Vrienden van het Museum te spraeke. Waat is ‘ne mins of ‘n vereniging zónger vrunj? Laura droog gedichskes euver ‘t thema vrunjsjap veur en benaodrökdje wie belangriek ‘t is det luuj zich óngerein helpe en veur-ein klaor staon. Daonao waerde oetgebreid genaote van de nuuj tentaonstelling, ‘n lekker stökske vlaai én nuuj opgedaone contacte!
Bookhanjel Krings Zitterd (Bokewaek 2023)
Op 18 mieërt 2023 kreeg Laura de kans óm zichzelf en häör gedichskes bie Bookhanjel Krings in Zitterd veur te stèlle. Laura droog vertèllendj veur oet häör dichbunjels ‘Vanmichveurdich’ en ‘Höb ‘t laeve leef’.
Veurdrach Veldeke Krink Ech
Tiejes de jaorvergadering van Veldeke Krink Ech droog Laura ‘n veurdrach op maot veur, speciaal gesjreve veur dees gelaegeheid. Laura benaodrökdje wie belangriek ‘t veur minse is óm geliekgesjtömde te vènje, óm tied door te brènge mit luuj die dezelfde passie höbbe en ‘t cómplimenteerde de Krink mit de sjoan activiteite die ze veur hun leje organisere.
‘Tekstverslaafd’
Op 26 jannewarie 2023 waerde veur ‘t ieës ‘ne ‘aope mic’ aovendj in poppodium Volt te Zitterd georganiseerd. Drik Heffels sloog de hènj in-ein mit ‘t Nuje Domein en brach luuj van alle laeftieje same, die allemaol ‘n passie veur taal höbbe. ‘t Waerdje ‘ne fantastische aovendj vol poëzie, spoken word, verhaole en rap. Ouch Laura droog ‘n aantal gedichskes veur en ‘t woor tiejes de twieëde editie op 30 mieërt opnuuj van de partie.
