Laura’s gedichskes en anger projecte zeen ouch in de media neet ónopgemerk gebleve.
SAME MIT VADER HERMAN IN DE FF NIKS – FEBRUARI 2025
Nao aanleijing van ‘t versjiene van ‘t book ‘Laes, lieër en lach’ gesjreve door vader Herman en oetgegaeve door dochter Laura sjreef Peter Swinkels ‘n artikel äöver ‘t toet standj kómme van dit book en de bezunjere samewèrking die dao aan veuraaf ging.
OPROOP TOET SPEGEL POËZIE DOOR DIALEKTDICHTERES
Op 20.01.2025, ‘Blue Monday’ reep Laura via häör socials én via L1 radio op toet ‘t sjrieve van ‘n gedichske op ‘ne spegel.
“Januari is veural hieël erg gries en det kèn behuuerlik op ‘t humeur wèrke. Door smörges ‘n leef, inspirerend of grappig gedich op diene spegel te laeze, begins se diene daag drek al good!”
Op dónderdig 30 januari begós de Waek van de Poëzie mit ‘t thema ‘lijfelijkheid’. Laura vroog minse in de aanloup nao daen daag foto’s van hun spegelgedich (en zichzelf) te deile mit de hashtag #Vanmichveurdich en häör te tagge.
Ónger angere influencer Lotte oet Limburgs, zangeres Katja Henz én väöle angere enthousiastelinge deje mit!
Beloester hie ‘t fragment van het intervieuw door Ruud Kleinen van L1 Radio mit Laura: Blue Monday verdient een Limburgse aanpak, met een Limburgs spiegelgedichtje! – L1
PROJEK WEESGEDICHTE TIEJES DE WAEK VAN DE POËZIE
Van 25 januari t/m 31 januari 2024 vónj de Waek van de Poëzie plaats. In ‘t kader daovan reep Bibliotheek de Domijnen dichters op óm zich te melje en aan ‘t project ‘Weesgedichten’ mit te doon. Laura zónj ‘n aantal gedichskes in en die waerdje vervolges aan ‘t publiek ter adoptie aangebaoje. De gedichskes kwome versprèdj door de ganse provincie op hieël bezunjere plaatse terech:
Zörgcentrum de Eghte adopteerde ’t gedich ‘Ich vènj dich zoa bezunjer’. De inhoud van de teks is natuurlik ’n sjoane boadsjap veur de minse die wone in de Eghte, maar ouch veur de minse die d’r wèrke of vriewilligerswerk doon!
Op ’t gemeintehoes van Ech woor ouch ’n gedich te zeen. Gekaoze waerdje veur ‘Kiek óm nao anger minse’. Door de inhawd van dit gedich op dit symbolische geboew te kènne laeze, kömp de teks nog mieë toet zien rech!
Laura is en blif ’n Slekkermaedje, maar ’t woont en wèrkt inmiddels in Mestreech. Ouch dao valle häör gedichskes in de smaak. Café Forum adopteerdje ‘Vier ’t laeve’, want det kèns se natuurlik super good doon in ’n gezellige kefee!
En ouch in Urmunj kwoom ein van Laura’s gedichskes terech. Doordet alle gedichskes op rame waerdje aangebrach, waerdje ouch dees teks letterlik door ’t zonleech ‘ne spegel en det zörgdje bie mènnige mins veur ‘ne lach.
Gedicht: Kiek èns in de spegel, Lach dichzelf toe, Weit det se belangriek bös, Doe, dich duis d’r toe!
PERSUUENLIK INTERVIEW IN DE VOILÁ – DAGBLAD DE LIMBURGER
In november 2023 interviewde Jules Coenegracht Laura veur de december editie van de Voilà. ‘t Waerdje ‘n hieël persuuenlik gesprek wo-in Laura vertèltj äöver woróm ‘t is beginne te dichte én woróm ‘t in ‘t Limburgs sjrieft. Es docente Duits bönne ‘n Èngelstalige opleiding haw ‘t de tale veur ‘t oetkeze,. ‘t Hert goof de doorslaag.
DE LIMBURGER
Dónderdig 29 juli 2023 puliceerde De Limburger ein van Laura’s gedichskes op de Limburgs Accent pagina in het Leef-katern. Laura koos veur ’n gedichske euver ’t waardere van de kleine dènger in ’t laeve.
‘t Zeen de kleine dènger
‘n Knikje, ‘ne lach
Twee vrunjtjelike ouge
Bóntje blómeprach
Dus bös se èns get lestig
Kiek den óm dich haer
De waereld is väöl sjoner
Zónger ‘ne brombaer!
Oet: Vanmichveurdich, blz. 83
SOL2
De aafgeloupe jaore is Laur mieërdere kieëre te gas gewaes bie de lokale ómroop van Ech-Zöstere. Leuk detail is det de studio in Laura’s aoj middelbare sjoal lik. Laura waerde al flot gevraogd of ‘t ‘n aantal video’s mit gedichskes van häöm wol opnumme. ‘t Programma iNBeeld waerde vervólges twieë seizoene lank edere waek mit ‘n anger gedichske van Laura aafgeslaote.
Wiltj ger de oetzendinge wo-in Laura te gas is gewaes gaer trök zeen? Gaont den nao de website van SOL2, klik op TV-Gids en daonao op trökkieke. Ger kómt den vanzelf in ‘t iNBeeld Archief terech.
OR6
Ouch mit de lokale ómroep van de Roerstreek haef Laura de aafgeloupe jaore ‘ne bezunjere bandj opgeboewd. ‘t Bezóch hunne studieo op 21 februari 2022 veur ‘t ieës in ‘t kader van ‘De internationele dag van de moedertaal’ en op oetnuuediging van Chris Trines.
Kort daonao kreeg Laura häör eige rubriek ‘T VAN MICH VEUR DICH GEDICH’ in ‘t radioprogramma ‘Kump good – dien aafspraok mit de Limburgse meziek’. De loesterieërs waerde vanaaf det moment edere waek op ‘n gedichske van Laura getrakteerd.
Ouch noom ‘t mit Chris ‘n speciale Valentijnsoetzending veur ‘t programma Kump Good op. De aafgesjtömde combinatie van gedichskes en meziek veel bie de loesterieërs dusdanig in de smaak, det Laura en Chris hun mit moderdaag en vaderdaag nog ‘ne kieër op ‘n speciale oetzending trakteerde.
Tiejes ‘t 50 jaorig jubileum van de ómroop zoot Laura ‘t ganse team flink in ‘t zunke door ‘n gedich op maot veur hun te sjrieve. Naodet ‘t mit vader Herman inne studio op bezeuk woor, kreeg ouch hae ‘n tiedelike rubriek op de radio mit zien verhaole en biebehuuerende spräöke.
L1 RADIO – ROUTE REGIO MIT RUUD KLEINEN & PLATEWEG MIT HENK HOVER
In de aanloup nao Laura’s ieëste lezing in Laeswinkel De Domijnen in Ech, die ter inleijing van de Nationale Bokewaek 2022 plaatsvónj, waerdje Laura door Ruud Kleinen van L1 radio gecóntacteerd. In ’n spontaan interview sprook Laura mit Ruud euver häör dankbaarheid veur de positieve respons op häör gedichte én euver ’t thema van de bokewaek: de Leefde. ‘t Interview is trök te loestere via de website van L1:Route Regio: Van mich veur dich, van Laura oet Slek – L1
In jannewarie 2023 waerdje Laura geïnterviewd door Judith Kuijpers van L1 veur ‘t programma ‘Plateweg’ geprissenteerd door Henk Hover.
Laura vertèldje euver häör passie veur ’t sjrieve en ’t Limburgs. Ouch loos ‘t ’n aantal gedischkes veur en waerdje ein van häör lievelingsleedjes veur häör gedreijd: Geneet van ’t laeve van Sjef Diedere.
’t Interview is via deze link te beloestere: Laura Theunissen over haar dichtbundel ‘Höb ’t laeve leef’ – L1
INTERVIEW IN DE LIMBURGER
In november 2022 waerde Laura geïnterviewd door Maurice van der Linden, dit in ‘t kader van ‘n speciale rubriek in De Limburger, die aandach guf aan startende óngernummers. Laura keek trök op de waeg dae ‘t toet det moment haw aafgelag en vertèldje woróm ‘t zoa geneet van ‘t ‘t sjrieve en veurdrage van häör gedichskes. ‘t Artikel laest ger via deze link:
Starter in Limburg: Laura Theunissen (Van mich veur dich) – De Limburger Mobile
MUSEUM VAN DE VROUW ECH
Op 21 september 2021 zoog Laura ‘ne oproop van het Museum van de Vrouw in Ech. M’n woor op zeuk nao foto’s en anger materiale veur ’n tentoonstelling getiteld ‘GRUUETS’, mit ’t idee óm ’n ode aan ’t smaalste stökske van Nederlandj te brènge. Laura twiefelde gein moment en stuurdje óngerstaond gedich in. ’t Kreeg ’n prominente plek in de expositie en Laura goof tiejes ‘t Echt Smal Festival 2022 mit väöl plezeer ‘ne workshop gedichte sjrieve in ‘t museum.
